ໃນຕອນບ່າຍຂອງວັນທີ 8 ເດືອນ ທັນວາ ( 12 ) 2021 ເລີ່ມແຕ່ເວລາ 2:00 ນ. ກົມການສຶກສານອກໂຮງຮຽນ (ກະຊວງສຶກສາທິການ ແລະ ກິລາ) ຮ່ວມກັບ ສູນໄອຊີທີ ພະແນກສຶກສາທິການ ແລະ ກິລາແຂວງຫຼວງພະບາງ ໄດ້ຈັດພິທີມອບ-ຮັບຜົນສຳເລັດຂອງໂຄງການສ້າງສື່ການຮຽນການສອນໃນຮູບແບບດີຈີຕາລຕາມຫຼັກສູດການສຶກສານອກໂຮງຮຽນສຳລັບຊັ້ນມັດທະຍົມຕອນຕົ້ນບຳລຸງ ທີ່ຫ້ອງປະຊຸມໃຫຍ່ສູນໄອຊີທີຫຼວງພະບາງ. ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ນາງ ພິລານີ ພິດສະໄໝ ຮອງຫົວໜ້າກົມ ກສນ ແລະ ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ພ້ອມດ້ວຍ ຫົວໜ້າຂະແໜງການສຶກສານອກໂຮງຮຽນ, ຂະແໜງສາມັນ, ຫົວໜ້າສູນ, ຮອງສູນ, ຄະນະຮັບຜິດຊອບໂຄງການ, ພະນັກງານສູນໄອຊີທີ ແລະ ຄູອາຈານເຂົ້າຮ່ວມ ຈຳນວນ 20 ທ່ານ.
ພິທີມອບ-ຮັບຜົນສຳເລັດຂອງໂຄງການຄັ້ງນີ້ ໄດ້ຮັບການຊີ້ນຳຈາກຄະນະພັກ, ຄະນະພະແນກ ແລະ ໄດ້ຮັບການເຫັນດີເປັນເອກະພາບຈາກຫົວໜ້າກົມການສຶກສານອກໂຮງຮຽນ ກໍ່ຄື ເຈົ້າຂອງໂຄງການ; ເຊິ່ງຈຸດປະສົງ ດັ່ງນີ້:
- ເພື່ອເຊັນມອບ-ຮັບຜົນສຳເລັດຂອງໂຄງການສ້າງສື່ການຮຽນ-ການສອນໃນຮູບແບບດິຈິຕາລຕາມຫຼັກສູດມັດທະຍົມສຶກສາຕອນຕົ້ນບຳລຸງຂອງກົມການສຶກສານອກໂຮງຮຽນ.
- ເພື່ອສາທິດການຄຸ້ມຄອງບຳລຸງຮັກສາສື່ການຮຽນ-ການສອນດິຈິຕາລ ແລະ ການນຳໃຊ້ເວັບໄຊ, ຊອງຢູທູບ ແລະ ເຟດບຸກ ເຂົ້າໃນການຮຽນ-ການສອນຂອງຄູ-ອາຈານ ແລະ ນັກຮຽນ.
- ເພື່ອປິດໂຄງການສ້າງສື່ການຮຽນ-ການສອນໃນຮູບແບບດິຈິຕາລຕາມຫຼັກສູດຊັ້ນມັດທະຍົມຕອນຕົ້ນບຳລຸງ ຂອງການສຶກສານອກໂຮງຮຽນ.
ໃນວາລະພິທີອັນມີຄວາມໝາຍສຳຄັນນີ້ ທ່ານ ຈັນທະລີ ອຸໄລສິດ ຮອງຫົວໜ້າສູນໄອຊີທີ ໄດ້ຂຶ້ນຜ່ານບົດສະຫຼຸບ ການຈັດຕັ້ງປະຕິບັດວຽກງານຖ່າຍທຳສ້າງສື່ການຮຽນ-ການສອນໃນຮູບແບບດິຈິຕາລຕາມຫຼັກສູດການສຶກສານອກໂຮງຮຽນ ສຳລັບຊັ້ນມັດທະຍົມຕອນຕົ້ນບຳລຸງ, ພ້ອມທັງແນະນໍາການນໍາໃຊ້ສື່ການຮຽນ-ການສອນແບບດິຈິຕາລ, ການນຳໃຊ້ ເວັບໄຊຂອງກົມການສຶກສານອກໂຮງຮຽນ ແລະ social media ຊ່ອງເຟດບຸກ ແລະ ຢູທູບ: ກົມການສຶກສານອກໂຮງຮຽນ
ຈາກນັ້ນ, ທ່ານ ນາງ ພິລານີ ຮອງຫົວໜ້າກົມ ກສນ ໄດ້ປະກອບຄຳຄິດເຫັນ, ໂອລົມຕໍ່ກອງປະຊຸມ, ໃນເບື້ອງຕົ້ນທ່ານໄດ້ສະແດງຄວາມຂອບໃຈ ແລະ ເຫັນດີເປັນເອກະພາບຕໍ່ບົດສະຫຼຸບ, ພ້ອມທັງແນະນຳບາງບັນຫາທີ່ມີຄວາມສຳຄັນຈຳເປັນຕໍ່ກັບວຽກງານພັດທະການສຶກສານອກໂຮງຮຽນ ແລະ ສະເໜີໃຫ້ສ້າງແຜນການເຄື່ອນໄຫວວຽກງານຂອງໂຄງການຮ່ວມກັນໃນໄລຍະຕໍ່ໄປ ຄື ການຝຶກອົບຮົມການນຳໃຊ້ສື່ການຮຽນ-ການສອນໃນຮູບແບບດິຈິຕາລໃຫ້ບັນດາຄູສອນຕາມໂຄງການຫຼັກສູດຂອງກົມການສຶກສານອກໂຮງຮຽນອີກດ້ວຍ. ຕໍ່ຈາກນັ້ນ, ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາແຂວງ ຍັງໄດ້ກ່າວຂອບໃຈຄະນະຮັບຜິດຊອບໂຄງການ ແລະ ການຮ່ວມມືກັນສ້າງສື່ການຮຽນ-ການສອນໃນຄັ້ງນີ້ ພ້ອມທັງເນັ້ນໜັກໃຫ້ຄູອາຈານ, ພະນັກງານສູນໄອຊີທີ ສືບຕໍ່ພັດທະນາວິຊາການ, ເອົາໃຈໃສ່ຕໍ່ຍອດຄວາມຮູ້ ເພື່ອກຽມພ້ອມໃນການປະຕິບັດໜ້າທີ່ວຽກງານໃນຕໍ່ໜ້າໃຫ້ດີຂື້ນເລື້ອຍໆ.
ເພື່ອເປັນການຢັ້ງຢືນເຖິງຜົນສໍາເລັດດັ່ງກ່າວ, ຕອນທ້າຍຂອງພິທີ, ປະທານທັງສອງຝ່າຍ ຍັງໄດ້ໃຫ້ກຽດຮ່ວມເຊັນໃບມອບ-ຮັບ ຮ່ວມກັນ, ພ້ອມດຽວກັນນີ້ທ່ານ ຊາຍສະຫວັນ ຈັນມານິດໄດ້ ມອບໃບຍ້ອງຍໍໃຫ້ກົມການສຶກສານອກໂຮງຮຽນທີ່ໄດ້ປະກອບສ່ວນຊຸກຍູ້ມອບອຸປະກອນຖ່າຍທຳໃຫ້ສູນໄອຊີທີຫຼວງພະບາງ ເພື່ອຮັບໃຊ້ເຂົ້າໃນວຽກງານຫ້ອງສະຕູດີໂອສູນໄອຊີທີ ພະແນກສຶກສາທິການ ແລະ ກິລາແຂວງຫຼວງພະບາງ ຄະນະດຽວກັນທ່ານຍັງໄດ້ກ່າວສະແດງຄວາມຂອບໃຈຕໍ່ຄະນະຮັບຜິດຊອບໂຄງການ ແລະ ການຮ່ວມມືໃນການສ້າງສື່ການຮຽນ-ການສອນຄັ້ງນີ້ ພ້ອມກັນນັ້ນທ່ານຍັງໄດ້ເນັ້ນໜັກໃຫ້ຄູອາຈານ, ພະນັກງານສູນໄອຊີທີ ສືບຕໍ່ພັດທະນາວິຊາການ, ເອົາໃຈໃສ່ຕໍ່ຍອດຄວາມຮູ້ ເພື່ອກຽມພ້ອມໃນການປະຕິບັດໜ້າທີ່ວຽກງານໃນຕໍ່ໜ້າໃຫ້ດີຂື້ນເທື່ອລະກ້າວ.
